英格兰新星救驾 多蒙特捧红「辛祖2.0」

xcy232323

德甲劲旅多蒙特今夏放弃收购英格兰翼锋查顿辛祖，原来佢哋早有後着，今季成功捧红20岁新星比诺基顿斯，呢位英格兰U21翼锋周四(19日)凌晨欧联，後备上阵连入2球，协助「蜜蜂兵团」作客3比0大胜布鲁日，今季只系踢180分钟就有4个入波，前途无限。
多蒙特今场作客布鲁日主导战局，不过面对主队顽强防守就冇晒计，比诺基顿斯68分钟後备登场改变战局，76分钟佢喺左路扣大位起脚省中人入网；86分钟比诺基顿斯再喺左路发难，几下插花後推入中路射入远柱，多蒙特补时再有古拉斯射入12码，大胜3比0完场。
比诺基顿斯同查顿辛祖一样喺曼城青训出身，早喺4年前就被多蒙特挖角，今季终於出头，上月底德甲对法兰克福，比诺基顿斯又系後备上阵梅开二度，带领多蒙特2比0赢法兰克福，今场再次成为「後备杀手」。
20岁零41日嘅比诺基顿斯，今场後备上阵入2球，系欧联史上第2年轻後备上阵入多过1球球员，仅次於1997年摩纳哥嘅查斯古特(20岁零7日)。