文迪归队踢走Kepa 目标1星期擸双冠！

xcy232323

       

        车路士喺世冠盃决赛前，有正选门神艾度亚文迪归队，呢位塞内加尔国脚周一(7日)先捧走非国盃冠军，但佢决定提前结束假期，直接飞去阿布扎比同车路士会合，有望喺呢场决赛复出把关！不过有传阿列沙巴拿加如果喺决赛冇得担正，今个夏天就会铁定离队。
        艾度亚文迪已经坐稳车路士正选，不过「世界最贵」门将阿列沙巴拿加今季有翻生迹象，4强对希拉尔一仗屡救险球，喺英联盃亦2次喺互射12码成为赢波英雄，帮车路士打入决赛，作为盃赛门将嘅佢，如果去到世冠盃决赛先至被贬後备，就可以正式对佢嘅车路士生涯「死心」。
        据报阿列沙巴拿加今季接受球会总经理、传奇门将施治嘅特训，无论喺企位、战术、踢法方面都作出改变，令呢位西班牙门将表现突飞猛进，只可惜一山不能藏二虎，为保住年底世界盃决赛周席位，阿列沙巴拿加季尾离队机会极大。