沙比萨收山脚牌都冇？桑拿士：佢存心伤人！

xcy232323

       

        曼联周日(19日)英超主场3比0大炒李斯特城，全队表现受到一致好评，不过中场沙比萨一次「收山脚」就引起极大争议，佢喺上半场尾段从侧边踩向菲斯膝头位置，落脚极之危险，但球证竟然只系判罚球，连黄牌都冇出示，VAR检查完亦觉得冇问题，但名宿桑拿士就猛烈发炮，直指沙比萨系存心要踢伤对手！
        当时两军喺李斯特城禁区外激烈争抢，菲斯先出脚解围，迟嚟嘅沙比萨就喺侧边一脚踩落佢膝头位置，由於出脚位置高兼动作危险，球证艾治维即刻吹停，出乎意料佢只系判李斯特城获得罚球，连牌都冇张！VAR球证保罗泰亚尼随後亦检视危险动作，但认为「冇重大误判」而冇行动，庆幸嘅系菲斯经治疗後可以继续比赛。
        为《天空体育》评述嘅利物浦名宿桑拿士炮轰：「呢球100%系红牌！沙比萨咁样出脚，佢系想踢个波咩？佢系向住个人嚟踢！」当VAR检查认为「冇问题」後，桑拿士再话：「我唔理一啲冇踢过波嘅球证点讲，如果呢脚唔系危险动作，请问点样先算系危险动作？」