夏兰特转会玩「评分」 皇马争输因为宾施马

xcy232323

       

        曼城前锋艾宁夏兰特今季疯狂入球，盛传皇家马德里视佢为未来收购目标，事实上皇马上年亦有份争夺呢位挪威前锋，可惜最终争输畀曼城。英国《泰晤士报》早前报道，原因艾宁夏兰特上年作转会决定前，系用一个「评分制」嚟判断提出斟介球队合唔合适，而皇马最後竟然输喺宾施马手上！
        艾宁夏兰特上年决定离开多蒙特後，收到曼城、皇马等多间豪门垂青，《泰晤士报》指佢同爸爸以及当时经理人拉奥拿，为一众斟介球队作出评分，项目包括球队竞争力、球场规模同前锋需要度等等，而当时皇马失分最多就系「前锋需要度」，考虑到宾施马正处於巅峰状态，艾宁夏兰特喺呢个项目只系畀皇马5分(最高10分)，相反曼城就拎足10分。
        西班牙媒体报道，皇马对艾宁夏兰特仍然有兴趣，盛传呢位挪威前锋同曼城合约中，有一条喺2024年生效嘅离队条款，皇马好可能会乘虚而入。宾施马今年年底就36岁，如果皇马明年再次出手，相信「前锋需要度」嘅评分将会大大提升。