欧联抽签曼联入噩梦小组 曼城做最大赢家

xcy232323

       

        欧联分组赛抽签周五(1日)喺法国举行，阔别1年後再次参赛嘅曼联被编入A组，除咗要硬撼有哈利卡尼嘅拜仁慕尼黑之外，仲有拥地狱主场嘅土耳其劲旅加拉塔沙雷，绝对唔易应付。同市嘅曼城就成为全晚最大赢家，唔单止分组赛抽上上签，艾宁夏兰特亦力压美斯膺UEFA最佳球员。
        英超4队喺欧联抽签命运迥异，曼联同拜仁慕尼黑、加拉塔沙雷、哥本哈根喺A组，要提防今季大搞嘅加拉塔沙雷，佢哋夏天签入莫路伊卡迪、韦费特沙夏同薛耶治等球星，曼联喺2012年亦曾经同呢支土耳其劲旅同组，当时两队对碰各赢1场，拜仁同曼联出线唔系必然。
        不过曼联签运未算最差，今届嘅「死亡之组」就落喺纽卡素身上，本身排喺第4档次嘅「喜鹊」，亦抽中第3档次最强嘅AC米兰，加上巴黎圣日耳门同多蒙特两大劲旅，F组4队实力相当均等，边两队出线都唔令人意外；至於相隔6季再战欧联嘅阿仙奴，喺B组就被视为出线大热(见分组表)。
        衞冕嘅曼城系全晚最大赢家，佢哋喺G组「易食指数」爆灯，同组只有RB莱比锡较具份量，贝尔格莱德红星同年青人都系陪跑居多，而喺欧洲足协(UEFA)颁奖礼入面，曼城前锋艾宁夏兰特就力压美斯同奇云迪布尼，首夺UEFA最佳球员，哥迪奥拿就当选UEFA最佳领队。
        欧联分组抽签结果
        A组●拜仁慕尼黑（德国）、曼联（英格兰）、加拉塔沙雷（土耳其）、哥本哈根（丹麦）
        B组●西维尔（西班牙）、阿仙奴（英格兰）、燕豪芬（荷兰）、朗斯（法国）
        C组●拿玻里（意大利）、皇家马德里（西班牙）、布拉加（葡萄牙）、柏林联（德国）
        D组●宾菲加（葡萄牙）、国际米兰（意大利）、萨尔斯堡（奥地利）、皇家苏斯达（西班牙）
        E组●飞燕诺（荷兰）、马德里体育会（西班牙）、拉素（意大利）、些路迪（苏格兰）
        F组●巴黎圣日耳门（法国）、多蒙特（德国）、AC米兰（意大利）、纽卡素（英格兰）
        G组●曼城（英格兰）、RB莱比锡（德国）、贝尔格莱德红星（塞尔维亚）、年青人（瑞士）
        H组●巴塞隆拿（西班牙）、波图（葡萄牙）、萨克达（乌克兰）、安特卫普（比利时）