三笘薰出书 教你120种练习盘球秘技

xcy232323

       


        白礼顿翼锋三笘薰唔止好波，而且好有文采，根据日本传媒报道，呢位25岁球星所写嘅书籍《VISION实现梦想的逆算思维》将於当地时间6月22日出版，初步发刊5万本。三笘薰将於书中分享球员生涯心路历程，仲会教大家120种练习盘球秘技。
        据悉呢本书主要写三笘薰由大学毕业成为职业球员至今嘅经历、遇到问题及解决方法，亦会提及上年世界盃分组赛日本对西班牙，佢喺底线「一毫米救波」传中帮助球队赢波嘅情况，同埋自己今季以7个联赛入波，打破日本球员单季英超入球纪录嘅感受。
        三笘薰喺书中当然唔少得分享踢波心得，佢列举出120种自己至今仍然有运用嘅练习盘球方法，仲会讲体能训练及食谱等内容。
        三笘薰卖花赞花香话：「点解我可以喺大学毕业之後成为职业球员，以至代表日本国家队踢世界盃，呢本书都会一一说明，唔止足球，我仲会透过呢本书，分享如何以不放弃精神改变人生，同埋讲一啲关於帮助日本球员喺世界球坛取得成功嘅意见。」如果大家想了解三笘薰多啲，甚至从佢身上偷师，学得一招半式，就要记得买书啦。