阿仙奴惨吞3蛋 曼城赢多1场即封王

xcy232323

       

        英超争霸大局已定！阿仙奴周一(15日)凌晨喺主场意外惨吞白礼顿3蛋，依家落後榜首踢少1场嘅曼城4分，意味曼城只要喺最後3轮赢1场，就足够实现衞冕任务。曼城最快下周日(21日)捧盃，如果阿仙奴周日凌晨作客诺定咸森林输波，曼城将自动封王，就算阿仙奴唔失分，「蓝月亮」随後主场击败车路士，亦可提早开冠军派对。
        曼城周日(14日)大胜爱华顿，阿仙奴要保住些微争标希望，今场不容有失，上半场同白礼顿互有攻守，李安度杜沙特曾劲射中楣，半场两队互交白卷。换边後阿仙奴表现忽然走样，51分钟安斯素龙门口轻松顶入1比0，阿仙奴群起反扑，再被白礼顿反击打爆，安达夫同佩华斯艾斯度比伦入波为白礼顿凑成3比0大胜。
        阿仙奴只剩最後2场联赛，就算赢晒都系得87分，有85分嘅曼城仲有3轮未踢，只需要赢多1场就肯定捧盃。阿仙奴队长马田奥迪加特赛後表示：「我哋要面对现实，我唔觉得曼城会有太多犯错，依家要做嘅就系踢好最後2场，所有人都值得有一个好嘅结尾，尤其系球迷。」季前以杀入前4为目标嘅阿仙奴，依家抛离第3位嘅纽卡素15分，早已锁定来季欧联参赛资格。