艾云东尼违规赌波 被重罚停赛8个月

xcy232323

       

        宾福特前锋艾云东尼上年底被英格兰足总控告违规赌波，佢喺今年3月承认262条控罪入面多项指控，英格兰足总周四(18日)宣布，重罚呢位英格兰国脚停赛8个月，艾云东尼要到2024年1月先至可以再次上阵比赛，佢事後喺社交网表示对结果「失望」。
        艾云东尼被控喺2017年至2021年间，多次违反英格兰足总赌波条例，虽然佢从未喺自己有份参与嘅赛事下注，但行为仍然系被禁止。足总判决声明表示：「艾云东尼被禁止参与任何足球相关活动8个月(直到2024年1月16日)，并且罚款5万镑(约48.8万港元)，即时生效。」艾云东尼喺停赛头4个月连操练都会被禁止，但获准喺最後4个月(9月17日开始)返球队练习。
        今次停赛，意味艾云东尼将缺席英格兰国家队嚟紧嘅欧国外赛事，27岁嘅佢目前排英超射手榜第3位，佢喺社交网回应判罚话：「我收到停赛8个月嘅通知，当然非常失望，判决书仲未公开，所以我唔适宜多讲，但我要多谢家人、朋友、球会同球迷对我嘅支持，我要集中精神准备下年重返我最爱嘅足球。」