欧国联决赛 克罗地亚斗西班牙大有睇头

xcy232323

       

        欧国联爆发王者战，由克罗地亚於中立场同西班牙争冠。「格仔兵团」寻求史上首个大赛冠军，队长莫迪历等「黄金一代」为圆捧盃梦，势必搏埋条老命；「狂牛」西班牙上届屈居亚军，自然唔想重蹈覆辙。双方斗心爆棚，加上近年碰头例必大手交易，2.5球入球大咪错过。（周一凌晨2时45分开赛）
        克罗地亚喺4强凭队长莫迪历炮制3个入波，包括先博到12码，再交出助攻及操刀极刑得手，戏剧性加时以4比2反胜东道主荷兰，首度杀入欧国联决赛，呢位37岁老将亦当选最佳球员。「格仔兵团」近年屡创佳绩，近两届世盃获得一亚一季，莫迪历、卡拉马历、比列锡及波索域等「黄金一代」居功至伟，只系每次离冠军总系差啲啲，难得今次杀入欧国联决赛，莫迪历讲到明希望为克军带来史上首冠，搏埋条老命都在所不计。
        另一边厢，「狂牛」西班牙喺4强以2比1力克意大利，新帅富安迪带咗4场波就有机会捧盃，认真好脚头。当中祖斯奴可以话系球队嘅幸运星，富帅首仗领军系欧国外大胜挪威3比0一役，尾段入替嘅祖斯奴，短短3分钟即梅开二度，令呢位新帅开个靓头。上仗对意大利，洛迪卡斯简迪完场前起脚省到对手後衞，个波咁啱落喺後备入替冇耐嘅祖斯奴脚下，又攻入绝杀士哥，真系行运行到落脚趾尾，今晚呢位老将随时又做後备奇兵。
        值得留意「狂牛」喺欧国联演出相当稳定，连续两届打入决赛，上届反输畀法国1比2，梗系唔想再做二奶，斗心必坚。翻查纪录，两军近4次正面交锋，法定时间全开3球或以上，包括2018年欧国联分组赛，两循环各赢一场，合共制造11个士哥，预计今仗甚有机会再演入球骚，大盘有计。